AS MIÑAS ÁRBORES: CARREIRA DO CONDE (1ª PARTE)
Imos a situarnos no comenzo da Rapa da Folla. Alí onde está o semáforo.
Dirixímonos pola beirarrúa da gasoliñeira cara o Campo da Estrela. Xusto ata rematar as escaleiras que nos baixan ó cruce de Xeral Pardiñas ca Carrreira do Conde.
Preocupados polas noticias que escoitamos sobor da construcción dun aparcamento debaixo de Xoan Carlos I, queremos dar a coñecer algunhas especies arbóreas de gran valor que alí se atopan.
Hoxe, aproveitando a xenerosidade de Raigame que me convidou a colaborar na revista O Pichel, falareilles das duas especies que bordean esa beirarrúa por onde iniciamos o paseo:
1)As ulmeiras(ulmus campestris)
2)As acacias(robinia pseudoacacia)
......................................................................
1)As ulmeiras(ulmus campestris)
Eu contei 20 exemplares de ulmeiras.
Esta árbore aparecía en moitas vilas como planta de paseo e parques.E lóxico,pois a sua beleza-tronco longo e groso,copa ancha,redondeada-une a sua gran capacidade de resistencia a contaminación,así como a facilidade para fixar ó chan, coas suas raices profundas.
As ulmeiras xa só quedan naturalizadas, en Galicia, na provincia de Ourense..
Como moitas outras árbores,dende antiguo a sua madeira foi moi apreciada na construcción e carpintería;Nas casas usaban as follas cocidas, contra ó reuma e contra a diarrea...
Istes 20 exemplares son dos poucos sobreviventes a grafiose-a praga, provocada por un fungo e transmitida por un coleóptero, que dende a primeira guerra mundial-1914/18-
fixo estragos nas ulmáceas.
Os primeiros exemplares de ulmeiras e acacias desta beirarrúa foron plantados cara ó ano 1930,cando se proxectaron os estanques arredor da estatua de Méndez Nuñez.
..........................................................................
2)As acacias(robinia pseudoacacia)
De acacias contei 15 exemplares.
Vou a reproducir parte do texto que a esta especie lle adicaron no seu libro: A Alameda, xardín pacego de Santiago, os profesores S.Ortiz, J.Izco, J.Rodriguez Oubiña, editado polo Concello de Santiago en 1986.
Aproveito para pedir a reedición actualizada desta obriña tan completa, que tanto nos fixo coñecer e querer as especies vexetales.
O texto adicado as acacias(Robinia pseudoacacia L.) sempre me fascinou pola sua compoñente histórica (Ese herborista Jean Robin, descubríndoa no Canadá-1601- enviándoa a Corte Real de Enrique IV; seu fillo plantando un exemplar no Museo das Plantas en 1635;exemplar que 150 anos dempois acadou os 20 metros de altura)
A outra fascinación veu dada pola compoñente diaria e práctica que a xente sempre tirou desta planta:
“.....as suas froles, que nacen en racimos pendurantes, brancas, de ulido e sabor agradabble son comestibles e coñécense popularmente coma “pan de queixo” e consúmense como recheo de filloas. Antiguamente preparábase con elas unha auga destilada á que se lle supuñan propiedades antihistéricas e antiespasmódicas; visitadas polas abellas producen un mel de regular calidade. As follas serven de alimentación complementaria ó gando.
A súa madeira é de cor pardo-dourada ou vermelliza,dura como a do freixo,pesada e elástica pero esgázase con facilidade. Así e todo amosa unha gran resistencia á presión vertical. Utilízase para esteos, entaboados, mobles taraceados, duelas, útiles caseiros, etc...”
E polo de hoxe,mais nada; apoio o sentir popular dos veciños de Carreira do Conde, de Raigame e de tódala xente con sensibilidade solicitando, a quen proceda, que se respeten as árbores desta zona.!!! Calquera delas vale tanto como ó mellor dos coches que se vaia aparcar alí!!
No título puxen I pois agardo poder falarvos de algunha favorita mais....
Agardo que o Pichel reciba tamén as vosas ideas, preguntas, suxerencias, etc.
Ata a próxima.
Antón da Sobreira
Santiago de Compostela
0 comentarios