Unha pequena xoia, tan necesaria...!
Difundimos artigo aparecido no Pichel nº 14, do secretario da A.Vv. Raigame, relativo a un libro sobre a nosa lingua...
Non sabedes canta alegría sentín, cando lin nos xornais que un novo libro galego foi presentado, simultaneamente, en cincuenta e cinco sitios distintos do mundo.
Efectivamente, o venres día 4 de febreiro de 2010, apareceu publicamente, o que debe ser o noso libro de cabeceira do galego :
55 mentiras sobre a lingua galega
Edicións Laiovento S.L ( www.laoivento.com ). –colección cadernos ensaio- coord por Xosé Henrique Costas –
A primeira virtude xa foi ese detalle tan orixinal : aproveitar as redes sociais de internet, para conectarse e facer o mesmo acto en sitios tan dispares como Melide, Wisconsin , Bos Aires ou Moaña...
( Coa primeira virtude, a primeira reflexión : non estamos solos : Canta xente entusiasta ama ó galego ! )
Naturalmente faltoume tempo para ir a mercalo - oito euros : prezo accesible - e engulilo nun par de horas, que saben a pouco.
Esa é a segunda virtude : a facilidade de lectura. É un libro tan grato e ameno, que non es quen de deixalo, ata rematar
( Segunda virtude, segunda reflexión : que bos profesionais temos !. Xente do colectivo Prolingua que lle dan xeito escrito – sen faltar a verdade – a cousas de sentido común, pero que os inimigos do idioma non atenden nin respectan )
Non me resisto a transcribir un par de textos do limiar, px.7
“Non sabe vostede, ou se cadra si, o difícil que resulta para o profesorado de Lingua galega no exterior –Tubinga, Toronto, Varsovia ...- dar explicado a un universitario alemán, ou a unha alumna canadense que certa xente, censada neste noso país, dedica moito tempo a combater a existencia plena, culta e oficialmente recoñecida do seu propio idioma.
Un amor elemental a humanidade fainos crer que tal cousa non é posible “...
“Chamámoslle actitude a predisposición a avaliar favorable ou desfavorablemente un obxecto, persoa ou situación ( unha lingua, no caso das actitudes lingüísticas ) e a actuar de acordo con esa avaliación.
Os prexuízos nacen das actitudes.
Un prexuízo é unha idea preconcibida, que ten a súa orixe nun erro – deliberado ou non – na categorización da realidade.” . px. 9
Esa é a terceira virtude: ser didácticos ; claridade , facilidade de exposición, razoamentos comprensibles.
( Terceira reflexión : definir un prexuízo : cantos saben o que é ?. Como non vai seducirnos este libro ? )
Xa vedes, estaría destripando o libro para todos vos ; é un texto que se deixa querer e que conforta as persoas.
Aínda así, remato coa cuarta virtude : clarividencia nas 55 mentiras – ver índice, px. 79 –
Nese afán pedagóxico, que impregna o libro - afán que leva implícita a veracidade, os datos contrastados, a evidencia histórica - está a súa eficacia: é un libro que te persuade definitivamente: o galego é unha lingua e o resto son 55 trolas baseadas en prexuízos.
Aquí vai unha delas ( px. 51 )
Falacia : “Temos dereito a que toda a sinalética e a documentación oficial –toponimia, administración, escolas, hospitais, etc. –estea nas dúas linguas “
Razoamento :Unha persoa normal , que acabe de chegar a Galicia e nunca tivese contacto co galego, entende ben o galego en menos dun mes, e pode falalo en menos dun ano, dada a proximidade estructural entre galego e castelán.
....
-En Galicia, di non entender galego o 1% da poboación . Ese 1% seica non entende sinais como “urxencias”, “tocoloxía”, “escola “, “pavillón de deportes”, “consellaría de traballo” , etc. porque o galego seica é complicadísimo ! -
En fin, compañeiros e veciños, anímovos a lectura pracenteira desta pequena xoia e , logo , darlle pulo para compartila coa xente de ben, pois - px.6 “queremos a nosa lingua como queremos os nosos pais ou os nosos fillos: porque son nosos; e abonda
Santiago, primavera do 2010
Agustín Pena Herva
0 comentarios