Se muestran los artículos pertenecientes a Diciembre de 2008.
Eu son....
Quercus suber ( galego : sobreira ) – (castelán : alcornoque )-
En Balboa, parroquia de Arnois, concello de A Estrada, provincia de Pontevedra, atópase o máis antigo exemplar de Sobreira que existe en Galicia.
É a Sobreira de Balboa, da cal xa hai constancia no século XVI, reinando os Reis Católicos, como pertencente a casa da Vila dos Hórreos.
Pódese ver moi preto da Nacional 525 (Santiago –Ourense ).
Malia as múltiples vicisitudes que sufriu – por exemplo, prendéronlle lume para expulsar un enxame de avellas –segue ergueita coa súa copa sempre verde, chea de múltiples, frondosas e fermosas polas.
Quen mellor que ela, por tanto, para darlle nome a esta miña afección botánica ; unha vez que nacer en Ombre –nas portas das Fragas do Eume – puxese o meu carón, a semente vexetal desta vella teima: valorar, coñecer e desfrutar dun valioso patrimonio natural : as nosas árbores.
Antón da Sobreira , 2008
...
Bibliografía: Árboles monumentales en el patrimonio cultural de Galicia ( 2 vol.) Carlos Rodríguez Dacal – Jesús Izco Sevillano.Consellería de Cultura. Xunta de Galicia. 2003
As miñas árbores (XIII ) Árbores Senlleiras -I -
Benqueridos lectores e veciños:
Hoxe vou comentarvos unha iniciativa, moi importante, que adoptou o goberno galego.
No Diario Oficial de Galicia nº 74, do 17 de Abril de 2007, disponse a creación dun CATÁLOGO GALEGO DE ÁRBORES SENLLEIRAS, dependente da Consellería de Medio Ambiente.
A Dirección Xeral de Conservación da Natureza regula, mediante Lei, a protección de árbores excepcionais polas súas características e importancia : idade, tamaño, rareza, historia ; calquera virtude é válida para protexer de riscos e ameazas a moitas árbores galegas, valiosísimas, que están en perigo.
Remata o decreto con tres anexos:
No anexo I, decláranse 106 árbores senlleiras na nosa Comunidade: desde a “Perona” da nosa Alameda –(1A)- ata as Washingtonias Robustas do Pazo de Santa Cruz de Rivadulla (106A).
No Anexo II decláranse 21 formacións senlleiras na nosa Comunidade: desde o “ Buxal da Casa da Botana “ en Arzúa (1F), ata os “Olmos do Xardín de San Carlos “ na Coruña (21 F)
O Anexo III é un formulario que se pon a disposición de entidades e cidadáns, para que poidan facer propostas ó Catálogo.
Naturalmente, para un afeccionado coma min, só procede felicitar a Xunta de Galicia, por tomar semellante acordo.
Aínda que, pensándoo ben, habería que preguntar:
“ E logo, non había nada feito ata o 2007, para protexer as nosas árbores senlleiras ?”
Pois non, amigos lectores.
A desidia política , cara a natureza e os temas botánicos, é tan profunda nestes tempos, que centos de especies vexetais singulares estaban en perigo de morte e non había nada feito para coidalas e protexelas.
( cantas desaparecerían nos últimos tempos ?? )
Teño sensacións contradictorias:
a) Menos mal que se fai algo !.
Este Catálogo paréceme un instrumento importantísimo, para traballar a prol da conservación de tanto patrimonio botánico como temos en Galicia.
Xa que nos abriron a porta para propoñer, suxerir e aportar exemplares senlleiros, debemos esforzarnos todos para que a Xunta non teña descanso, coidando de tantas xoias arbóreas galegas... porque
b) Pérdese tanto tempo coa lentitude burocrática !
Sen discutir os criterios de saída , ¿ por qué se catalogan 106 árbores, e non 110 ou 120, etc. ? - Xa digo, é unha primeira medida, e imos darlle o beneficio da boa vontade –
O triste, o desalentador é que, ano e medio despois deste avance histórico no eido medioambiental galego, só houbese tres (3) incorporacións o Catálogo de Árbores Senlleiras: O Carballo de Portacal en Sobrado dos Monxes; o Carballo de Luxís en Castro de Rei, e a formación de Tileiros Prateados do atrio da Igrexa de San Domingos, en Ribadavia....
Se , en 18 meses, Concellos, Deputacións, Consellerías, Colectivos, Ecoloxistas, Comunidades Veciñais, cidadáns...non fixeron propostas,
¡ malo !
E se as fixeron, e non foron atendidas
¡ moito peor !
E tamén deprime ler, na web institucional
http://novas.xunta.es/node/12627
que a Consellería de Medio Ambiente “ten previsto sinalizar cunha placa cada un dos exemplares incluídos no Catálogo(..) e completarase cun Manual de Identidade, que servirá para verificar a identificación e fomentar a súa divulgación...”
Entendedes agora, o da lentitude burocrática ?
En fin, prezados lectores, agardo poder falarvos - no vindeiro Pichel- dos exemplares compostelás que forman parte do Catálogo Galego de Árbores Senlleiras.
E, mentres, gozade da beleza invernal das nosas árbores:
paga a pena !!.
polo San Martiño de 2008
Antón da Sobreira
